Exo 9 | NdeIBE | STEP | UJehova wasesithi kuMosi, “Yana kuFaro uthi kuye, ‘Nanku okutshiwo nguJehova, uNkulunkulu wamaHebheru, ukuthi, “Yekela abantu bami bahambe, ukuze bayengikhonza.”

Exodus 9

Uhlupho ezifuyweni

1 UJehova wasesithi kuMosi, “Yana kuFaro uthi kuye, ‘Nanku okutshiwo nguJehova, uNkulunkulu wamaHebheru, ukuthi, “Yekela abantu bami bahambe, ukuze bayengikhonza.”

2 Ungabalela ukuthi bahambe ube ulokhu ubabambile 3 uJehova uzakwehlisela isifo esibi ezifuyweni zakho emadlelweni – amabhiza enu, obabhemi lamakamela njalo lezinkomo, izimvu lezimbuzi.

4 Kodwa uJehova uzakwenza umahluko phakathi kwezifuyo zaba-Israyeli lezamaGibhithe ukuze kungafi lasinye isifuyo saba-Israyeli.”

5 UJehova wamisa isikhathi esithile wathi, “UJehova uzakwenza lokhu kusasa elizweni leli.” 6 Lakanye ngelanga elilandelayo uJehova wakwenza: Zonke izifuyo zamaGibhithe zafa, kodwa akufanga ngitsho lasinye isifuyo sama-Israyeli. 7 UFaro wathuma amadoda ukuyahlola umonakalo afumana ukuthi kwakungafanga sifuyo lasinye sama-Israyeli. Kodwa inhliziyo yakhe yala ilokhu ilukhuni, wabalela abantu ukuthi bahambe.

Uhlupho lwamathumba

8 UJehova wasesithi kuMosi lo-Aroni, “Thathani umlotha omlutshwana eziko lifike kuFaro uMosi awutsahazele emoyeni phambi kwakhe. 9 Uzakuba luthuli phezu kwelizwe lonke laseGibhithe, lapho-ke kuzaphihlika amathumba amabi ebantwini lasezinyamazaneni kulo lonke ilizwe.”

10 Ngakho bathatha umlotha eziko baya kuFaro. UMosi wawutsahazela emoyeni, abantu bonke lezinyamazana zonke kwamilwa ngamathumba aphihlikayo. 11 Izangoma zehluleka ukumisana loMosi ngenxa yamathumba ayezibulala kanye lamaGibhithe wonke.

12 Kodwa uJehova wayenza yaba lukhuni inhliziyo kaFaro wala ukulalela uMosi lo-Aroni njengoba uJehova wayevele etshilo kuMosi.

Uhlupho lwesiqhotho

13 UJehova wasesithi kuMosi, “Vuka ekuseni kakhulu uyojamela uFaro, uthi kuye, ‘Nanku okutshiwo nguJehova, uNkulunkulu wamaHebheru, uthi: Yekela abantu bami bahambe ukuze bayongikhonza. 14 Kungenjalo kulesi isikhathi ngizakwehlisa ubunzima bezinhlupho zami obulesihluku phezu kwakho, phezu kwezinceku zakho labantu bakho ukuze lazi ukuthi kakho omunye onjengami emhlabeni wonke.

15 Kunje nje ngabe sengiselulile isandla sami ngakutshaya kanye labantu bakho ngesifo ebesizakucitsha emhlabeni.

16 Kodwa ngikuphephisile ngayonale injongo yokuthi ngikubonise amandla ami, lokuthi ibizo lami lifakazwe kuwo wonke umhlaba. 17 Ulokhu utshingela abantu bami ubalela ukuthi bahambe. 18 Ngalokho-ke ngasona lesi isikhathi kusasa ngizakwehlisa isiqhotho esingakaze sehlele eGibhithe lilokhu lababala laba khona ilizwe leli.

19 Wohla nje uthumezele ilizwi lokuthi izifuyo zakho lakho konke olakho emadlwelweni kakubuyiswe kuvalelwe esibayeni esivikelweyo ngokuba isiqhotho leso sizatshaya umuntu wonke lesifuyo sonke esingabuthwanga nxa silokhu sisegangeni, konke kuzakufa.’ ”

20 Lezozikhulu zikaFaro ezalesabayo ilizwi likaJehova zaphanga zangenisa izigqili zazo lezifuyo ngaphakathi.

21 Labo abangalinanzanga ilizwi likaJehova izigqili zabo lezifuyo zabo bakuyekela kusegangeni.

22 UJehova wasesithi kuMosi, “Yelula isandla sakho siye phezulu ukuze kune isiqhotho eGibhithe lonke, phezu kwabantu lezinyamazana laphezu kwakho konke okukhulayo emasimini aseGibhithe.” 23 UMosi wonela ukukhomba ngentonga yakhe phezulu uJehova wehlisa umdumo lesiqhotho, umbane walavuka phansi emhlabathini. Ngakho uJehova wanisa isiqhotho elizweni laseGibhithe. 24 Isiqhotho satshaya umbane walavuka yonke indawo. Sasingakaze sibe khona isiphepho esinjalo sekulokhu isizwe saseGibhithe saba khona. 25 Isiqhotho satshaya saqothula yonke into egangeni, abantu lezinyamazana; sabhuqa konke okukhulayo emasimini, saphundla izihlahla zonke.

26 Indawo eyasilayo yiGosheni lapho okwakulabako-Israyeli khona.

27 UFaro wasebiza uMosi lo-Aroni. Wathi kubo, “Okwamanje ngenze isono. UJehova uqondile, kukanti mina labantu bami kasiqondanga.

28 Thandazani kuJehova, ngoba ukukhwaza kwezulu lesiqhotho sekwanele. Ngizaliyekela lihambe; akusadingeki ukuthi lihlale.” 29 UMosi waphendula wathi. “Nxa sengiphumile edolobheni ngizavula izandla zami ngikhuleke kuJehova. Ukuduma kuzakhawula kungabe kusaba lesiqhotho, ukuze wazi ukuthi umhlaba ngokaJehova. 30 Kodwa ngiyazi ukuthi wena lezikhulu zakho lilokhu lingamesabi uJehova.”

31 (Uphoko lamabele kwabhuqwa nya ngokuba amabele ayeselezikhwebu lophoko selumumethe. 32 Ingqoloyi lenyawuthi khona kakuthintwanga ngoba kuvuthwa muva.)

33 UMosi wasesuka kuFaro waphuma edolobheni. Welulela izandla zakhe kuJehova; ukuduma kwezulu lesiqhotho kwakhawula, izulu alabe lisachithekela emhlabeni. 34 Kwathi uFaro ebona ukuthi izulu lesiqhotho lokukhwaza kwezulu kwasekukhawukile waphinda wenza isono: Yena lezikhulu zakhe benza izinhliziyo zabo zaba lukhuni.

35 Ngakho inhliziyo kaFaro yaba lukhuni akaze avumela aba-Israyeli ukuhamba njengoba uJehova wayetshilo ngoMosi.